|
إن قلت سولف يسولف لي بتسبيلـة وان قلت بالله يقسم لـي بسلهامـة |
يا ويل حيٍّ تولّـع فيـه يـا ويلـه كم من شهر مرّ لا صامه ولا قامـه |
حيٍّ يشوفه وشاف الرمش يومي لها دخل على الله كيف تشيله عظامـه |
من ناعس الطرف ذبّاح العرب غِيلة كم واحدٍ صافح المـوت اوّل ايّامـه |
خلّى بياضه بياضي عبد عـزّي لـه بسْ ما عليّه حلاة الخـدّ بالشامـة |
طفلٍ وتوّه صغيـر السـنّ ياحليلـه يا ميْت! يا ميْت! من يلقـاه قدّامـه |
توّّّّه يسالم على الترويض باقي لـه في عالم الحـبّ زرفالـه ودرهامـة |
يمكن بعـد ليلتيـن ويمكـن الليلـة بسّ آتأكّد واشوفـه شـقّ هندامـه |
يا وش يهمّه وانا ما نيب من جيلـه من عام الاوّل وهو ريمٍ وانـا رامـة |
حياة من لا عشق شرواه وش هي له لا وا خسارة ياْ ليلٍ مـرّ مـا نامـه |
عليه كفّـي يحَفـر القبـر ويهيلـه واخالط الناس بسّ عْقـال وعمامـه |
لو بيـن مـزّة وتعميـرة وتعسيلـة يا وين انا والورَق والنرْد والدامـة |
سيد العذارى يوصّي لي واوصّي لـه وقبلي خواله عليه توصّي اعمامـه |
وان ذبت انا فيه قبلـي ذاب منديلـه ولو ذاب حتّى عليه الثوب من لامـه |
ومن يفتتن به ترى مااحدٍ يراعي له فتنة هل السبت من قامه ومن هامه |
مفتون في طفل توّه ما لِبَس شيلـة اجل وشَ يْصير بي لو كمّل اعوامـه |
الرئيسية
